Добро утро со Инфомакс: Како Велигден да ми е, како да вoскреснувам

Христос воскресна! Навистина воскресна! Денеска, во чест на најголемиот христијански празник, Велигден, во рубриката “Добро утро со Инфомакс” ви издвојуваме неколку велигденски песни од Анте Поповски.

Добро утро Македонци, нека е за многу години.1

Велигден

Утринава на прозорец спроти нас 
пак се покажа старичката.

Се затетерави низ дворот
како детенце кога проодува
и се заниша како гранче чесно дрво
и пак се засолни.

Излегла напролет старичката.
Што ми е убаво на душава, 
како Велигден да ми е, 
како да воскреснувам.

Воскресение

Расцутен двор, камбани што корнат еден дрвен крст 
И го фрлаат меѓу ѕвездите,
Празничен чаршаф, свеќа што догорува 
И твојот празен стол покрај трпезата.

Велигденчиња

Са ноќ стоеше сама крај прозорецот 
и нешто ги молеше пролетните ветришта.

Гласот ѝ го дочу земјата 
и некаде го скри.

Утрината во дворот гласот беше се престорил 
во виолетови, небесни и бели

венчиња — велигденчиња.