Додик: Немам против Курти да си игра држава ама го дестабилизира цел Балкан

Претседателот на Република Српска Милорад Додик денеска изјави дека косовскиот премиер Албин Курти продолжува да ја дестабилизира ситуацијата на Балканот, избегнувајќи ги меѓународните обврски и искривувајќи ги фактите не само од сегашноста, туку и од минатото.

Коментирајќи ја изјавата на Курти, во која тој ги спореди Република Српска и Заедницата на српски општини кои треба да се формираат на северот на Косово и рече дека тоа е начинот на кој Србија создава ентитети на Балканот за да формира, к „српски свет“. Додик потсети дека ЗСО е дел од Бриселскиот договор што Курти не сака да го спроведе, иако има карактер на меѓународна обврска.

Додик истакна дека Република Српска не е создадена како одговор на малцинството во БиХ, туку како одговор на конститутивниот народ кој со векови живеел и ќе продолжи да живее на тој простор.

„Исто така, Србите во Косово не се и не можат да бидат малцинство затоа што се Срби и ќе останат такви“, истакна Додик.

Тој потсети дека само Албанците цело време биле малцинство и во рамките на поранешна Југославија и во денешна Србија и дека, како што рече, „плашејќи го светот со „српскиот свет“, полека го заокружуваат „албанскиот свет““. .

Додик нагласи дека нема ништо против, како што рече, „Курти да си игра држава“, но не во Република Српска и не во Србија, наведувајќи дека Албанија е „прилично пространа за таков манипулатор“.

Курти вчера изјави дека „Белград сака втора Република Српска“ и дека „не треба да се заборави горчливото искуство во Босна и Херцеговина со Република Српска“.

Share on Facebook

Tweet

Follow us

Save