Додик повикан на распит во Обвинителството на БиХ за поткопување на уставниот поредок

Претседателот на Република Српска (РС) Милорад Додик денеска се очекува да се јави во Обвинителството на БиХ како осомничен за напад на уставниот поредок на државата, откако потпиша указ со кој се прогласуваат закони за забрана на работата на Судот и Обвинителството на БиХ, како и на Агенцијата за истрага и заштита на БиХ на територијата на РС. Освен него, осомничени се и премиерот на Република Српска Радован Вишковиќ и претседателот на Народното собрание на Република Српска Ненад Стевандиќ.

Тие закони беа усвоени од Националното собрание на РС на 27 февруари, а на 7 март Уставниот суд на БиХ ги поништи.

Додик претходно изјави дека нема да одговори на поканата од Обвинителството на БиХ, наведувајќи дека РС не ги признава активностите на таа институција на своја територија.,

Според процедурата, доколку Додик не сака да дојде на рочиштето во Обвинителството на БиХ, мора да испрати оправдана причина поради која е спречен да присуствува, по што ќе му биде испратена нова покана.

Доколку не се јави на таа покана, тогаш според Законот за кривична постапка на БиХ се издава наредба за приведување, а во краен случај се распишува потерница.

Share on Facebook

Tweet

Follow us

Save