Додик: Ќе прогласам независност на Република Српска, имам добри односи со Путин, Ердоган, Кси и Орбан

Членот на Претседателството на БиХ, Милорад Додик, потврди дека отцепувањето на Република Српска е најважната цел што се обидува да ја постигне и дека само чека погоден момент кога ќе го реализира тој проект.

„Јас сум вечен чувар по ова прашање. Токму сега знам некоја констелација на односи што може да се совпаднат во светот, Европа, Америка. Ако тоа се случи, веднаш ќе прогласам независност“, рече Додик отворено во интервју за комерцијалната телевизија УНА.

Тој додаде дека единственото нешто од кое се плаши е дека би можел да „преспие“ погоден момент за одвојување на РС од Босна и Херцеговина и дека неговата сегашна стратегија е да покаже трпение за да избегне евентуална реакција од
Западот на неговите планови.

Тој се пофали дека одржува добри односи со рускиот претседател Владимир Путин, Кинезот Кси Џинпинг, турскиот претседател Реџеп Таип Ердоган и унгарскиот премиер Виктор Орбан, сугерирајќи дека тие се негови можни сојузници во спроведувањето на плановите.

За ова на крајот да се оствари, тврди Додик, важно е да не се дозволи опозицијата која би го тргнала од власт да победи на изборите во октомври.

„Не смее да им се дозволи на западните фаворити да дојдат на власт. Тие веќе сметаат на тие кандидати на опозицијата“, рече Додик, додавајќи дека веќе е целосно убеден во победата на 2 октомври.

Share on Facebook

Tweet

Follow us

Save