Домашни и странски експерти ќе дадат целосна оценка: Завршен инспекцискиот надзор за случајот со пациентката од Струмица

Министерството за здравство соопшти дека Државниот санитарен и здравствен инспекторат ги завршил вонредните инспекциски надзори во здравствените установи каде што била лекувана пациентката С.М. од Струмица.

Надзорите биле спроведени во Општата болница во Струмица, Клиничката болница во Штип и Универзитетската клиника за неврологија. Во текот на контролите биле разгледани медицинската документација и биле земени изјави од здравствените работници кои учествувале во лекувањето на пациентката.

Поради сериозните здравствени компликации кај пациентката, донесена е одлука да се спроведе и стручен надзор од комисија составена од специјалисти по неврологија, анестезиологија, гинекологија, радиологија и неврохирургија. Во комисијата ќе биде вклучен и медицински експерт од соседна држава.

Од Министерството информираа дека по завршувањето на оваа постапка јавноста ќе биде известена за наодите и заклучоците. Инаку, пациентката С.М. остана неподвижна по породување со царски рез.

Share on Facebook

Tweet

Follow us

Save