ДУИ: Загрижувачко е сведоштвото на уставниот судија Кадриу, како се вратиле југословенските имиња на улиците во Тетово

Изјавата на уставниот судија Осман Кадриу по одлуката за поништување на имињата на улиците, булеварите и плоштадите во Тетово и враќањето на имињата од југословенскиот период претставува исклучително загрижувачко сведоштво за начинот на кој се водела оваа постапка, велат од ДУИ.

„Според самиот Судија Кадриу: Општина Тетово не ја бранела својата одлука од 2007 година и не ги презентирала потребните аргументи пред Уставниот суд; Владата не доставила никаков конкретен одговор и не презела никакви чекори за одбрана на овој акт; Одлуката е донесена со етничко надгласување, при што двајцата судии албанци и еден судија турчин останале во малцинство.
Доколку овие наводи се точни, тогаш станува збор за троен институционален неуспех. Прво, недозволиво е Општина Тетово да не застане во одбрана на една одлука која речиси две децении претставува дел од урбаниот и историскиот идентитет на градот. Второ, недозволив е молкот на Владата по прашање кое директно ги засега меѓуетничките односи, мултиетничкиот карактер на државата и духот на Охридскиот рамковен договор. Трето, длабоко загрижува фактот што прашања со висока етничка и политичка чувствителност се решаваат преку логика на етничко надгласување, што ја поткопува довербата во институциите кои треба да бидат гаранти на еднаквоста и соживотот. Граѓаните заслужуваат јасни одговори: зошто Општина Тетово не ја бранеше својата одлука? Зошто Владата молчеше и како беше дозволено едно прашање од толку големо значење за Албанците да остане без институционална заштита“, стои во соопштението на ДУИ.

Share on Facebook

Tweet

Follow us

Save