Дурловски повика Македонија да испрати дарувана крв за повредените во Бугарија: Пред човечките животи, граници и политики не смее да има!

Оперскиот пејач Игор Дурловски упати иницијатива Македонија да покаже солидарност со соседна Бугарија преку испраќање дарувана крв за повредените во трагичната сообраќајна несреќа на автопатот „Тракија“, во која загинаа повеќе од десет лица, а десетици беа повредени.

Во објава на социјалната мрежа Фејсбук, Дурловски изрази сочувство до семејствата на загинатите и порача дека човечноста и солидарноста мора да бидат над политичките несогласувања меѓу двете држави.

„Сочувство до семејствата на загинатите во тешката сообраќајна несреќа во Бугарија.

Човечката солидарност е највисок израз на цивилизациската совест.

И покрај политичките несогласувања, симболично, но и суштински, треба да испратиме дарувана крв за повредените, затоа што пред болката и пред човечките животи, граници и политики не смее да има“, порача Дурловски.

Неговата иницијатива доаѓа во момент кога бугарските здравствени установи упатија итни апели за крводарување по катастрофалните верижни судири на автопатот „Тракија“, во близина на Јамбол.

Националниот центар за трансфузиона хематологија на Бугарија ги повика граѓаните да даруваат крв, додека болниците во Сливен и Бургас организираа крводарителски акции за обезбедување дополнителни резерви за лекување на повредените.

Трагедијата се случи во утринските часови на 10 ноември, кога густа магла и исклучително намалена видливост придонеле за два големи верижни судири. Според информациите на бугарското Министерство за здравство, најмалку 11 лица го загубиле животот, а 46 биле хоспитализирани.

Повикот на Дурловски отвора можност за конкретен хуманитарен гест од Македонија кон Бугарија, во период кога билатералните односи се оптоварени со политички и историски несогласувања.

Со својата порака, Дурловски нагласува дека трагедиите не познаваат националност и дека спасувањето човечки животи треба да биде заеднички приоритет, независно од политичките разлики.

Засега станува збор за јавна иницијатива, а не за официјално организирана акција за испраќање крв од Македонија. За евентуална реализација би била потребна координација меѓу надлежните здравствени и трансфузиолошки институции на двете држави.

Share on Facebook

Tweet

Follow us

Save