Европа би можела да го почувствува првиот голем енергетски шок уште ова лето

Глобалните нафтени резерви се приближуваат кон критичните нивоа, а енергетските аналитичари предупредуваат дека Европа во наредниот период би можела да се соочи со сериозен притисок врз снабдувањето со гориво и со нов бран поскапување на енергенсите.

Проблемот, според експертите, веќе не се сведува само на цената на барелот туку и на реалната достапност на нафтата на пазарот во услови на геополитички тензии, особено поради војната со Иран и нарушувањето во Хормускиот Проток – еден од клучните светски енергетски коридори.

Главниот енергетски стратег на „Карлајл груп“, Џеф Кари, предупредува дека пазарот е под силен притисок, при што Азија веќе се приближува до минималните оперативни нивоа на резерви, а Европа би можела да биде следната погодена регија.

Според него, иако на хартија глобалните резерви изгледаат стабилно, реалната слика е поинаква, бидејќи значаен дел од нафтата не е фактички достапен за пазарот поради технички и оперативни ограничувања во системите за складирање и за транспорт.

Дополнителен проблем претставува и состојбата со дизелот, каде што веќе се забележуваат нагло поскапување и пазарно нарушување. Дизелот, кој е клучен за транспортот, индустријата и во земјоделството, според аналитичарите, може да стане главен канал преку кој ќе се прелее енергетската криза во пошироката економија.

Европскиот пазар засега се одржува релативно стабилен, делумно и поради увозот на нафта од американските стратешки резерви. Но, експертите предупредуваат дека ваквиот модел не е долгорочно одржлив, бидејќи и тие резерви постепено се намалуваат.

Меѓународната агенција за енергија веќе сигнализира дека доколку не дојде до стабилизација на извозот од Блискиот Исток, пазарот може да влезе во „црвена зона“ во текот на летните месеци, особено во јули и август, кога потрошувачката традиционално расте.

Ситуацијата дополнително ја усложнува фактот што околу една петтина од светската трговија со нафта поминува низ Хормускиот Проток, па секое нарушување на овој коридор има директен ефект врз глобалната енергетска стабилност.

Аналитичарите предупредуваат дека во услови на ниски резерви, пазарот станува сè понестабилен, а ценовното движење може брзо да премине во силна волатилност, со директни последици врз инфлацијата и врз трошоците за живот во Европа.

Share on Facebook

Tweet

Follow us

Save