Европската Унија ја предупреди Албанија: Спорниот туристички проект може да го загрози патот кон членството

Европската комисија ја предупреди Албанија дека контроверзниот туристички проект во заштитеното подрачје Вјоса-Нарта, кој се поврзува со бизнисменот Џаред Кушнер, би можел да влијае врз нејзиниот напредок на патот кон членство во Европската Унија.

Предупредувањето доаѓа во период кога во Албанија веќе неколку дена траат протести против изградбата на луксузен туристички комплекс во регионот, кој е познат по богатата флора и фауна, вклучувајќи фламинга, медитерански мечки и морски желки.

Од Европската комисија порачаа дека Албанија треба да се воздржи од активности кои би можеле да го загрозат исполнувањето на условите од Поглавјето 27, кое се однесува на животната средина и климатските промени.

Брисел побара од албанските власти целосно усогласување на законодавството со европските правила за заштита на природните живеалишта и птиците, како и укинување на измените во Законот за заштитени подрачја и преиспитување на Законот за стратешки инвестиции.

Според Европската комисија, албанскиот министер за животна средина Софјан Јаупај информирал дека работите на проектот се стопирани и дека ќе биде спроведена процена на влијанието врз животната средина со учество на граѓански организации.

Во меѓувреме, Специјалното обвинителство за борба против корупцијата во Албанија отворило истрага за промените на статусот на заштитеното подрачје и сопственоста на земјиштето поврзано со проектот.

Протестите, кои организаторите ги нарекоа „Револуција на фламингата“, добија поддршка и од албанската дијаспора во повеќе европски градови и во САД.

Албанија, заедно со Црна Гора, се смета за една од најсериозните кандидатки за членство во Европската Унија од Западен Балкан. Албанскиот премиер Еди Рама претходно изјави дека целта на земјата е да стане членка на Унијата до 2030 година.

Share on Facebook

Tweet

Follow us

Save