Еден месец пред изборите, Вучиќ најави помилувања и амнестија за студентите кои ги предводеа протестите

Претседателот на Србија, Александар Вучиќ, денес објави дека ќе донесе одлука за помилување и аболиција на некои лица за настаните од изминатата година и пол, а во овој контекст ги спомена и „Новисадската група“ и студентката Мила Пајиќ.

Вучиќ, на почетокот од своето гостување на Радио телевизија на Србија (РТС), не прецизираше по име за кого ќе се однесуваат помилувањата, но по повеќе од еден час од гостувањето, рече дека тоа се однесува и на „Пајиќовата група од Нови Сад“.

„Мислам дека дел од луѓето учествуваа во сè што се случуваше во земјата во последната година и пол, од двете страни. Многумина ќе бидат изненадени од помилувањата и аболицијата“, рече тој.

Додаде дека една одлука ќе важи за оние кои имаат осуда, а друга одлука за оние кои немаат осуда.

„Верувам дека ова ќе придонесе и за помирен живот и подобро разбирање на сите“, рече Вучиќ.

Тој рече дека ја прифаќа дебатата со кандидатите на Студентската листа, но како што вели, тие ќе изгубат во секоја дебата.

„Прифаќам, и со нив и со првите на листата на студентски блокади, како и да се нарекуваат. Што се однесува до нашата листа, јас сум и носител и прв на листата. Ако не сум во можност и ако не сум подготвен да одговорам на вашите прашања по моите долгогодишни и 15-16 часа ангажман секој ден, тогаш не треба да се занимавам со оваа работа“, рече Вучиќ за Српската радиотелевизија (РТС).

Тој додаде дека кандидатите од студентската листа не можат да одат на дебатата бидејќи ќе изгубат на секоја.

„Тие не можат да одат на дебатата денес. Ќе изгубат на секоја, бидејќи сите се стари лица, добро познати лица, нема никој нов. Сите, би рекол, луѓе кои не биле успешни или кои биле исклучително лоши во вршењето на својата работа“, рече тој.

Тој рече дека, доколку победи на вонредните парламентарни избори на 25 октомври, ќе ги разгледа и предлозите на одредени кандидати од опозицијата за реформите во државата.

Share on Facebook

Tweet

Follow us

Save