Една од најантимакедонските партии во Бугарија потпиша договор за соработка со партијата на Путин

Проруската националистичка бугарска партија „Преродба“ потпишала договор за соработка со владејачката партија во Русија, „Единствена Русија“ на Владимир Путин, пишува „Еурактив“.

„Договорот предвидува размена на искуства, идеи и политичка пракса меѓу двете партии и претставува важен позитивен чекор кон обновата на целосните бугарско-руски односи“, соопшти опозициската партија на прес-конференција.

Договорот го потпишале заменик-претседателот на „Преродба“ Цончо Ганев, кој е и потпретседател на Бугарскиот парламент, и Владимир Јакушев – заменик-претседателот на Горниот дом на Државната дума на Руската Федерација.

„Преродба“ е третата најголема партија во бугарскиот парламент по изборите во октомври лани, со 33 пратеници од вкупно 240. Партијата отворено се противи на членството на Бугарија во Европската Унија и НАТО и се залага за неутралност во конфликтот во Украина. Таа безуспешно се обиде да иницира и референдум за забрана на воведувањето на еврото во земјата.

Популарноста на десничарско-популистичката партија предводена од Костадин Костадинов (кому поради проруските позиции Украина му забрани влез во земјата во 2022 година) порасна благодарение на цврстите ставови против вакцините и карантинот за време на пандемијата, за таа со време да израсне во сериозен фактор на бугарската политичка сцена.

Share on Facebook

Tweet

Follow us

Save