Едномесечен притвор за поранешен министер на Косово и уште шестмина осомничени за корупција

Основниот суд во Приштина одреди притвор во траење од еден месец за поранешниот министер за економски развој на Косово, Фадил Исмаили, како и за уште шест лица, кои беа уапсени во четвртокот под сомнение за вмешаност во коруптивни дејствија.

Покрај Исмаили, притвор им е определен и на лица со иницијали Ј.М., Н.К., М.Б-Д., Б.Д., Ш.Т. и Г.Л., соопшти судот.

„Судијата на претходна постапка, по сослушувањето на странките и анализата на предметот, утврди дека барањето на Специјалното обвинителство на Република Косово е основано и донесе одлука за определување мерка притвор во траење од еден месец за сите осомничени“, се наведува во соопштението на судот.

Судот оцени дека притворот е соодветна и неопходна мерка за обезбедување непречен тек на кривичната постапка и дека, во оваа фаза, не постои поблага мерка која би ја гарантирала истата цел.

Против ова решение, осомничените имаат право на жалба до Апелациониот суд во Приштина.

Share on Facebook

Tweet

Follow us

Save