INFOMAX.MK

Ерменија ќе се обрати до Русија и ОН за помош поради влошувањето на ситуацијата на границата со Азербејџан, соопшти прес-службата на ерменската влада по состанокот на Советот за безбедност, со кој претседаваше премиерот Никола Пашинјан. .

„За време на состанокот се разговараше за понатамошни чекори за спротивставување на агресивните дејствија на Азербејџан против Ерменија кои започнаа на полноќ. Во врска со агресијата на суверената територија на Република Ерменија, беше одлучено официјално да се поднесе жалба до Руската Федерација за да се имплементираат одредбите од Договорот за пријателство, соработка и взаемна помош, како и од Организацијата на Договорот за колективна безбедност и Советот за безбедност на ОН“.

Ереван претходно објави дека азербејџанската армија ја гранатирала територијата на Ерменија користејќи артилерија и беспилотни летала, а исто така презела „акции за унапредување на позициите во некои области. Поради тоа има загинати и ранети на ерменска страна, нивниот број се утврдува“.

Баку објави дека ерменската армија пукала врз позициите на азербејџанските војници на границата. Азербејџанското Министерство за одбрана исто така пријави загуби во своите редови.