ЕСЧП ја осуди Турција поради притворањето на судиите кои ги ослободија опозиционерите

Турција беше осудена од Европскиот суд за човекови права (ЕСЧП) за затворање двајца судии кои во 2015 година ослободија лица осомничени дека припаѓаат на група која Анкара ја прогласи за терористичка, јави дописникот на МИА.

Европскиот суд утврди повреда на членот 5.1 (право на слобода и безбедност) и и наложи на Анкара на секој од судиите да им плати по 5.000 евра за нематеријална штета, се вели во соопштението. Апликантите, Мустафа Басер и Метин Озчелик, практикувале во тоа време во кривичните судови во Истанбул. Во 2015 година, тие учествуваа во одлуката за ослободување на шефот на медиумската група Хидајет Караџа, како и шеесетина полицајци уапсени на крајот на 2014 година за, според правдата, заговор против турскиот претседател.

Сите тие беа осомничени дека припаѓаат на „Фетулахистичката терористичка организација/Паралелна државна структура“, посочува ЕСЧП. Двајцата судии за возврат беа осомничени дека припаѓаат на ова движење на проповедникот Фетула Ѓулен, инсталиран во Соединетите Американски Држави и сметан од претседателот Реџеп Тајип Ердоган како поттикнувач на обидот за пуч во јули 2016 година. Ѓулен потоа беше обвинет од турските власти дека ширел сомнежи за корупција, чија цел била владата во декември 2013 година, кога Реџеп Ердоган сè уште беше премиер.

Уапсени во 2015 година, двајцата судии беа осудени во 2017 година на 10 години затвор за „припадност во терористичка организација“ и „злоупотреба на власта“, потсетува Судот во соопштението. Во својата одлука, која се однесува само на нивниот истражен притвор, ЕСЧП особено укажа на „незаконитоста“ на овој притвор и „отсуството на веродостојни причини да се сомничат дека сториле кривично дело“. (МИА)

Share on Facebook

Tweet

Follow us

Save