ЕУ бара САД да ослободат од царина стоки во вредност од 150 милијарди евра

Европската унија побара од Соединетите Американски Држави да изземат европски производи во вредност од околу 150 милијарди евра од царината од 15%, која беше воведена со трговскиот договор постигнат во Тарнбери во 2025 година. Според документ до кој дошол Euronews, на листата се наоѓаат стотици производи, меѓу кои рокфор сирење, маслиново масло, вина, жестоки пијалаци, пиво, тестенини, медицински уреди, електрична опрема и индустриски машини.

Претставникот на Европската комисија за трговија, Матијас Јоргенсен, изјавил пред европратениците дека се избрани производи кои се од големо економско значење за ЕУ или имаат ограничена домашна достапност на американскиот пазар. Брисел се надева дека по укинувањето на европските царини за американските индустриски производи од 1 јули ќе успее да договори и американски отстапки, со што дел од европскиот извоз повторно би се оданочувал со претходните, значително пониски царински стапки.

Европската комисија, исто така, сака да започне преговори и за американските царини од 50% за челик и алуминиум, но признава дека тие разговори ќе бидат особено тешки бидејќи Вашингтон ги смета овие сектори за прашање на национална безбедност. Јоргенсен предупреди дека, и покрај трговскиот договор, економските односи меѓу ЕУ и САД ќе останат нестабилни, особено поради заканите на американскиот претседател Доналд Трамп кон земјите што воведуваат дигитални даноци за големите технолошки компании.

Извор: Euronews

Share on Facebook

Tweet

Follow us

Save