Жените во Македонија за еднаква работа заработуваат 12 отсто помалку од мажите

И покрај законските гаранции за еднаква плата за еднаква работа, жените и понатаму заработуваат помалку од мажите, алармираат од Алијансата за родова еднаквост (GEA) по повод 18 септември, Меѓународниот ден на еднаква плати.

Во Македонија, последните официјални податоци покажуваат дека родовиот јаз во платите изнесува околу 12 отсто, а најголемите разлики се забележуваат кај лицата со високо образование и кај вработените на возраст од 45 до 49 години. Ова покажува дека високото образование и професионалното искуство сами по себе не се доволни за да обезбедат еднаква економска положба на жените, пренесува агенцијата Мета.мк.

Од организацијата посочуваат дека родовиот јаз во платите не започнува на денот кога се исплаќа платата, туку многу порано, а разликата во заработувачката е видлива последица на невидливите нееднаквости што се акумулираат во текот на целиот работен век на жените.

„Таа започнува со изборот на професија, продолжува преку ограничените можности за напредување, недоволната застапеност на раководни позиции, поголемата грижа за семејството и домот, нееднаквиот пристап до финансии и претприемништво, а на крајот се рефлектира и во висината на платата, пензијата и економската сигурност“, велат од Алијансата.

Принципот на еднаква плата за еднаква работа е утврден уште со Договорот од Рим во 1957 година и претставува едно од основните начела на Европската Унија. Сепак, и покрај повеќе од шест децении законски гаранции и политики за еднаков третман, напредокот во намалувањето на родовиот јаз во платите останува бавен.

Според Меѓународната организација на трудот (ILO), жените на глобално ниво и понатаму заработуваат околу 20% помалку од мажите, додека најновите податоци на Евростат покажуваат дека родовиот јаз во платите во Европската Унија во 2024 година изнесува 11,1%. Иако во последните години се бележи постепено намалување на разликите, тие остануваат значајни, особено кај жените на повисоки позиции и во најпродуктивниот дел од работниот век.

Share on Facebook

Tweet

Follow us

Save