Жител на шарпланинско село во Косово е уапсен за шпионажа, му нашле 40.000 евра

Полицијата на Косово соопшти детали за апсењето на лице осомничено за шпионажа, кое било лишено од слобода на граничниот премин Мердаре. Станува збор за Ф. С., кој по одлука на Специјалното обвинителство е задржан во полициски притвор 48 часа, јавија косовските медиуми.

По апсењето, истражители од Дирекцијата за истрага на организиран криминал и тешки кривични дела, со судски налог, извршиле претрес во домот на осомничениот во селото Драгаш, на падините на Шар Планина над Призрен.

При претресот биле пронајдени и запленети 39.500 евра во кеш, 500 динари, четири мобилни телефони, како и различни документи кои, според полицијата, се релевантни за истрагата.

Од Специјалното обвинителство најавуваат дека во законски предвидениот рок ќе поднесат барање до Основниот суд во Приштина за определување мерка притвор за осомничениот.

Полицијата на Косово, Специјалното обвинителство и другите безбедносни институции продолжуваат со преземање на мерки и собирање докази во рамки на истрагата за случајот.

Осомничениот се товари за кривично дело „шпионажа“, а понатамошниот тек на постапката ќе зависи од собраните докази и одлуките на надлежните институции.

Share on Facebook

Tweet

Follow us

Save