Забранета утринската програма на „Информер“ во Србија

Регулаторното тело за електронски медиуми на Србија (РЕМ) донесе одлука со која ѝ забрани на телевизијата „Информер“ во Србија да ја емитува утринската програма на период од седум дена поради прекршување на законот за изборната кампања. Имено, според одлуката водителката на „Информер“ го изразила својот политички став за време на предизборната кампања, со што, според Советот, ги прекршила правилата што важат за давателите на медиумски услуги за време на изборната кампања. Утринава одлуката почна да се спроведува. Гледачите на телевизијата „Информер“ утрово ги дочека пробна слика со логото на телевизијата наместо вообичаената утринска програма.

Драган Вучиќевиќ, уредникот на ТВ „Информер“, вчера соопшти дека телевизијата добила одлука од Регулаторното тело за електронски медиуми (РЕМ) со која се забранува емитување на емисијата „Прва инфо“ и слични програмски содржини без оглед на евентуалните промени во насловот, терминот на емитување или други околности преку кои содржината би можела да се идентификува.

Според Вучиќевиќ, мерката се однесува на временскиот интервал помеѓу 7 и 8 часот и 30 минути наутро.

Денеска во 10 часот, закажана е нова седница на Советот на РЕМ, свикана за одлучување по претставки што се однесуваат на законски прекршувања, вклучително и оние што ја засегаат телевизијата „Информер“.

Share on Facebook

Tweet

Follow us

Save