Западот на нозе: Лукашенко ќе ја посети Кина

Белорускиот претседател Александар Лукашенко ќе ја посети Кина на покана на претседателот Си Џинпинг, објави денеска портпаролката на кинеското Министерство за надворешни работи Хуа Чунјинг.

Таа изјави дека Лукашенко, сојузникот на рускиот претседател Владимир Путин, ќе престојува во Кина од 28 февруари до 2 март.

Белоруските власти ја поддржуваат Русија, од која се зависни и финансиски и политички, во нејзината инвазија на Украина.

Патувањето на Лукашенко во Кина доаѓа во време на загриженост на Западот дека Кина се подготвува да испрати оружје во Москва.

Белорускиот претседател објави дека вчера на годишнината од почетокот на рускиот напад, имал долг разговор со Путин, пренесува Ројтерс.

Во петокот разговараа и кинескиот министер за надворешни работи Чин Ганг и неговиот белоруски колега Сергеј Алејник.

Кинеското министерство соопшти дека двајцата разговарале за желбата на Пекинг да соработува со Минск за да се продлабочи меѓусебната политичка доверба.

Во септември минатата година, во Самарканд во Узбекистан, Лукашенко и Си најавија сеопфатно стратешко партнерство меѓу двете земји.

Share on Facebook

Tweet

Follow us

Save