Започнува реконструкцијата на Граничниот премин Делчево

Започнува реализацијата на проектот за реконструкција и модернизација на Граничниот премин Делчево, соопшти градоначалникот на Општина Делчево Иван Гоцевски.

Проектот го реализира Царинската управа со финансиска поддршка од Европската Унија преку Инструментот за претпристапна помош ИПА III, а предвидува реконструкција на повеќе објекти и инфраструктурни сегменти на граничниот премин.

Во рамки на проектот ќе се реконструира управната зграда на ГП Делчево, како и зградата за стоково царинење на терминалот. Предвидена е и реконструкција на асфалтните површини и подземните водови, како и дислокација и поставување нова дигитална вага за товарни возила.

Според Гоцевски, договорот за изведување на градежните работи е потпишан во јули 2026 година, со што се создадени услови за започнување на конкретните активности на терен.

Градоначалникот упати благодарност до Владата, Министерството за транспорт, Царинската управа и сите институции вклучени во реализацијата на проектот, како и до Европската Унија за финансиската поддршка.

– Особено ме радува што Делчево добива помодерен, пофункционален и подобро организиран граничен премин, кој е една од најважните порти на нашата општина и државата кон Република Бугарија и Европската Унија, истакна Гоцевски.

Тој оцени дека реконструкцијата ќе има значење не само за граѓаните кои секојдневно го користат граничниот премин, туку и за стопанството, транспортот и туризмот во Делчево и поширокиот источен регион.

Граничниот премин Делчево претставува важна патна врска меѓу Северна Македонија и Бугарија, а неговата модернизација, според локалната самоуправа, се очекува да придонесе за подобрување на условите за патници и товарниот сообраќај.

Share on Facebook

Tweet

Follow us

Save