Засилени контроли на улиците и патиштата во Охрид за време на високата посета

Секторот за внатрешни работи Охрид информира дека од денеска до 22 јули 2026 година, додека индиската претседателка престојува во Охрид, ќе бидат спроведени засилени безбедносни мерки и посебен режим на сообраќај.

Од СВР Охрид посочуваат дека мерките се насочени кон физичко и сообраќајно обезбедување на улиците, патиштата и објектите низ градот. За реализација на активностите веќе се остварени контакти со локалната самоуправа, јавните претпријатија, службите за одржување на патиштата и други надлежни институции.

Полициската станица за безбедност во патниот сообраќај во Охрид од денеска интензивно спроведува контроли, регулирање и обезбедување на сообраќајот, особено на булеварот „Туристичка“, но и на останатите сообраќајници каде што ќе има ограничувања за запирање и паркирање на возила.

Посебните мерки ќе ги опфатат и патните правци од Охрид кон Свети Наум, магистралните, регионалните и локалните патишта, како и заштитниот појас покрај сообраќајниците, улиците во населените места и паркиралиштата во централното градско подрачје и стариот дел на Охрид.

СВР Охрид упати апел до граѓаните да ги почитуваат насоките и наредбите на полициските службеници, со цел непречено одвивање на сообраќајот и безбедност на сите учесници.

Граѓаните се повикуваат своите возила да ги користат само кога е неопходно и, доколку можат, да изберат алтернативни начини на превоз во периодот на посетата.

Share on Facebook

Tweet

Follow us

Save