INFOMAX.MK

Украинскиот претседател Володимир Зеленски изјави денеска дека Украина нема да ги признае териториите окупирани од Русија и нема да се согласи да ја намали својата војска за време на претстојните разговори за ставање крај на војната.

„Наш приоритет е нашата силна армија. Значи, ова е црвена линија за нас – нема намалување на бројот на нашата армија. Да бидам искрен, ќе направиме се за да ја задржиме армијата во состојбата во која е денес. Голема армија, три пати поголема отколку што беше на почетокот на војната“, рече тој на средбата со лидерите на територијалните заедници на Чернихив.

Зеленски, исто така, истакна дека приоритетната „црвена линија“ на Украина во идните мировни преговори ќе биде непризнавањето на териториите окупирани од Русија.

„Друго геополитичко прашање е непризнавањето на какви било територии окупирани од Русија. Тоа се украински територии, ова е една од најважните црвени линии за нас. Во секој случај, тоа се привремено окупирани територии“, нагласи украинскиот лидер, пренесува Укринформ.

Тој рече и дека праведен мир ќе дојде кога ќе се вратат сите територии.