ЗНМ реагира на заканувачка содржина насочена кон новинарите Александар Митовски и Милош Милошевски

Здружението на новинарите на Македонија (ЗНМ) изразува сериозна загриженост поради заканувачка содржина објавена на социјалната мрежа Фејсбук, во која е споделена монтирана фотографија на новинарот Александар Митовски прикажан како мртовец во ковчег, додека во придружниот коментар се упатуваат заканувачки пораки кон новинарот Милош Милошевски, вклучително и директна закана по неговиот живот.

Во објавата се користи заканувачка формулација со која се најавува насилство врз новинарот, што претставува сериозен обид за заплашување и предизвикува загриженост за безбедноста на засегнатите новинари. Ваквите содржини се особено загрижувачки кога се шират преку социјалните мрежи и можат дополнително да поттикнат непријателство и притисок врз новинарите.

ЗНМ бара од надлежните институции внимателно да ја испитаат содржината, да ги утврдат околностите под кои е објавена и да преземат соодветни мерки во рамки на своите надлежности. Истовремено, апелираме до платформите на социјалните мрежи да постапуваат соодветно по пријавите за содржини што содржат закани и заплашување.

ЗНМ потсетува дека заканите кон новинарите се недозволиви и дека нивната безбедност мора да биде гарантирана без оглед на темите за кои известуваат, нивните ставови или јавниот ангажман. Слободното и независно новинарство не смее да биде предмет на заплашување и насилни закани.

Share on Facebook

Tweet

Follow us

Save