Израелски медиуми: Турција го спречи планираниот упад на курдските сили во Иран

Според израелскиот i24News, Турција извршила притисок врз САД да престанат да ги поддржуваат курдските борци кои наводно биле подготвени да го нападнат Иран претходно оваа година.

i24News објави дека курдските милиции се подготвувале за операцијата со месеци со поддршка на САД и Израел, и дека плановите вклучувале средби со курдски групи, трансфер на оружје и воена обука. Според истиот извештај, борците добиле оружје една недела пред планираниот напад, но Вашингтон на крајот ставил вето на операцијата по притисок од претседателот Реџеп Таип Ердоган.

Неименувани израелски извори тврдат дека американскиот потпретседател Џ.Д. Венс ги открил деталите за операцијата на Турција, по што Анкара веднаш реагирала за да ја спречи. Изворите не сакале да прецизираат каква била можната улога на Мосад, израелската служба за надворешно разузнавање, во овие подготовки.

Со години Турција се бори против курдските сепаратисти на своја територија, како и во Ирак и Сирија, па затоа евентуалниот пад на централната влада во Техеран би претставувал дополнителен безбедносен проблем за Анкара на југоисточната граница. „Њујорк тајмс“ во март објави дека турскиот министер за надворешни работи Хакан Фидан го предупредил американскиот државен секретар Марко Рубио да не ја поддржува курдската операција во Иран.

Си-Ен-Ен претходно објави дека ЦИА им обезбедувала воена поддршка на курдските вооружени групи долж иранско-ирачката граница со месеци пред заедничкиот израелско-американски напад врз Иран кон крајот на февруари. Исто така, во март, Ројтерс објави дека израелската разузнавачка служба била во контакт со курдските милиции стационирани на таа граница една година пред војната.

Во меѓувреме, продолжуваат судирите со низок интензитет меѓу Иран и курдските вооружени групи. Минатата недела, Иран објави дека уби петмина членови на Демократската партија на Ирански Курдистан на северозападниот дел од земјата, откако, според иранските обвинувања, тие влегле на територијата на земјата во близина на Пираншахр во покраината Западен Азербејџан.

Соопштението на i24News доаѓа во време на зголемени тензии меѓу Израел и Турција. Фидан минатата недела за CNN Turk изјави: „Израел не е само мој проблем; Израел е проблем на целиот свет“.

Во исто време, израелскиот министер за дијаспора, Амихај Чикли, за Кан 11 изјави дека сценариото во кое Турција ќе го нападне Израел е „целосно можно“.

Share on Facebook

Tweet

Follow us

Save