Израелците го бомбардираат пограничниот град Рафа, каде што се кријат над милион бегалци

Израелските сили денеска бомбардираа област во близина на јужниот пограничен град Рафах, каде што засолниште побара повеќе од половина од вкупното население на Појасот Газа, еден ден откако израелскиот премиер Бенјамин Нетанјаху го отфрли предлогот за прекин на војната во палестинската енклава.

Нетанјаху вчера изјави дека предлогот на Хамас за примирје е „заблуда“ и најави продолжување на борбата и победа за неколку месеци. Одбивањето на израелскиот премиер дојде по интензивните дипломатски напори да се стави крај на четирииполмесечната војна, пред можниот израелски напад на Рафа, каде во моментов живеат повеќе од еден милион луѓе, од кои многумина во импровизирани шатори и со недостиг од храна и лекови.

Показател дека се уште не е исклучено дипломатско решение е дека делегацијата на Хамас денеска пристигна во Каиро на разговори со посредниците Египет и Катар. Хуманитарните агенции предупредуваат на претстојната катастрофа доколку Израел ја исполни својата закана да влезе во Рафа, еден од последните делови на Појасот каде што израелските војници не стапнале.

Израелски авиони утринава бомбардираа делови од областа, а жителите јавуваат дека во две куќи загинале 11 лица. Тенковите биле насочени кон делови од Источен Рафа, интензивирајќи ги стравувањата на населението од претстојната инвазија. И покрај тоа што Израел го отфрли предлогот на Хамас, дипломатските разговори продолжуваат.

Американскиот државен секретар Антони Блинкен рече дека се уште има простор за преговори. Тој на вчерашната прес-конференција рече дека актуелниот предлог на Хамас содржи голем број „не-стартери“, без да открие за што се работи.

Во таа прилика Блинкен повтори дека бројот на цивилни жртви во израелската офанзива е превисок, па затоа го повика Израел да ја стави нивната благосостојба на прво место. „Ова е особено точно во случајот со Рафах, каде што има меѓу 1,2 и 1,4 милиони луѓе, главно бегалци од другите делови на Газа.“

Share on Facebook

Tweet

Follow us

Save