Израел оштетил повеќе од 80 проценти од зградите во Газа за време на војната

Израелските сили оштетиле повеќе од 80 проценти од сите згради во Појасот Газа од почетокот на војната во енклавата на 7 октомври 2023 година, покажуваат најновите податоци од Палестинскиот централен завод за статистика (PCBS), објави денес Ал Џезира.

„Според најновата сателитска проценка спроведена од Сателитскиот центар на Обединетите нации (UNOSAT), околу 201.290 згради биле оштетени во израелската окупациска агресија врз Појасот Газа помеѓу 7 октомври 2023 година и 16 јуни 2026 година“, се наведува во соопштението на PCBS издадено по повод Светскиот ден на живеалиштата и Денот на арапското домување.

Институтот соопшти дека ова претставува околу 82 проценти од вкупниот број згради во Појасот Газа. Од вкупниот број уништени згради, 134.422 беа целосно срамнети со земја, додека 13.848 згради претрпеа тешки оштетувања, соопшти PCBS во извештајот, додавајќи дека бројот на оштетени станбени единици изнесува 328.627.

Окупираниот Западен Брег, исто така, наводно претрпел обемни штети од страна на израелските сили.

„Во бегалскиот камп Џенин, вкупниот број на оштетени згради достигна 680, што претставува приближно 53 проценти“, соопшти Палестинскиот завод за статистика.

Според податоците на таа институција, во бегалскиот камп Нур Шамс беа оштетени 434 згради, што е 55 проценти од вкупниот број, додека во бегалскиот камп Тулкарм оштетени се 407 згради, или приближно 37 проценти, заклучно со февруари 2026 година.

Share on Facebook

Tweet

Follow us

Save