Како и секоја година во овој период на годината повторно се поставува комплетно непотребната дилема – Св. Трифун или Св. Валентин?

Таа е секако вештачки наметната затоа што тоа е ден кој треба да зближува, а не да разделува. Посветете им посебно внимание на најблиските за денешниот празник Св. Трифун, а Ден на вљубените нека Ви биде секој ден во годината.

Легендата вели дека Свети Валентин живеел во Рим за време на владеењето на императорот Клаудиј Втори, кој започнал и водел многу војни при што имал тешкотии да собере војници. Вината за тоа ја нашол во брачниот и љубовниот живот на потенцијалните војници и затоа забранил склучување веридби и бракови. Валентин, кој бил свештеник, и покрај строгата забрана ги венчавал вљубените. Поради тоа бил уапсен, мачен и убиен токму на 14-ти февруари 269 година од нашата ера. Два века подоцна бил прогласен за светец.

Свети Трифун, според преданијата, живеел во третиот век и се занимавал со своето домаќинство и со чување гуски. Имал чудесна моќ да лекува голем број болести со молитва. Се верува дека ја излекувал ќерката на римскиот цар Гордијан од душевната болест. Царот богато го наградил, а Трифун богатството го поделил со сиромашните. За време на владеењето на римскиот цар Дациј, Трифун бил мачен и откако не се откажал од христијанството бил убиен.

Се верува дека овој светец ги заштитува посевите, а за свој заштитник го земаат кафеанџиите и винарите, кои токму на денешен ден за прв пат во годината ги закројуваат лозите. Според народните верувања, ако на денот на Свети Трифун врне дожд или снег, годината ќе биде плодна, а ако е ведро времето не очекува сушна и јалова година пред нас.

Модерните и екстремно комерцијални времиња денешниот ден го поврзуваат најчесто со прекумерно трошење преку купување на цвеќе и ситни, но и скапи подароци, праќање на SMS пораки и електронски честитки, славење по кафеани… Притоа како да ја забораваме суштината на двојниот празник.

Сепак за изразување на љубов и наклоност не е доволен само еден ден во годината. На љубените, саканите и блиските со мали гестови кои ги греат срцето и душата, љубовта треба да им се искажува секојдневно.

Share on Facebook

Tweet

Follow us

Save