Камион пропадна среде новоасфалтирана улица вредна 130.000 евра во Охрид

Неодамна реконструираната улица „Аџи Мустафа“ во Охрид стана сцена на необичен сообраќаен инцидент, откако товарен камион буквално пропадна низ свежиот асфалт. Инцидентот предизвика силни реакции во јавноста, особено поради фактот што градежните работи на оваа локација завршија пред само еден месец.

Голема инвестиција, експресен дефект Проектот за санација на улицата опфати површина од 4 800 метри квадратни, а за неговата реализација беа потрошени повеќе од 130.000 евра. Иако граѓаните очекуваа долготрајно и квалитетно решение, патот не го издржа ниту првиот месец од пуштањето во употреба.

Настанот веднаш наиде на политички реакции. Од општинската организација на СДСМ Охрид излегоа со соопштение во кое остро го критикуваат квалитетот на изведбата и менаџирањето на локалната власт.

„По повеќе од 6 месеци хаотични и неспособно водени работи на улицата „Аџи Мустафа“, денес камион пропадна среде патот. Наместо безбедна и функционална улица, граѓаните добија раскопан хаос“, реагираат од СДСМ Охрид.

Граѓаните на социјалните мрежи веќе го отвораат прашањето за одговорноста на изведувачот и надзорот кој дал дозвола вака изведената улица да биде пуштена во сообраќај.

Share on Facebook

Tweet

Follow us

Save