INFOMAX.MK

Кина објави дека започнала „специјална поморска операција“ источно од Тајван, дополнително заострувајќи го својот одговор на неодамнешниот договор меѓу Јапонија и Филипините. Овие две земји планираат да започнат преговори за поморските граници во таа област и подлабоко да ги поврзат своите одбранбени сили, објави „Блумберг“.

Кинеското Министерство за транспорт организираше „специјална операција за спроведување на поморскиот сообраќај“ во саботата, објави официјалната новинска агенција Ксинхуа. Според истиот извештај, целта на овој потег е да се спроведе „поморската административна надлежност“ на Кина и да се заштитат националните интереси.

Овој потег на официјален Пекинг претставува силна ескалација и директен одговор на најавата на Токио и Манила дека ќе седнат за да ги решат граничните спорови. Овие разговори се однесуваат на водите источно од Тајван, самоуправна демократија што Пекинг ја смета за своја територија. Споменатата област се преклопува и со ексклузивните економски зони на кои Кина полага право.

Испраќање бродови како знак на отворено незадоволство

Разговорите меѓу Јапонија и Филипините „сериозно го прекршија територијалниот суверенитет и поморските права и интереси на Кина“, според извештајот на агенцијата Ксинхуа.

Поморските агенции од провинциите Фуџијан и Гуангдонг, како и силите од Источнокинеското Море, во саботата се придружија на операцијата за рација и контрола. На сето ова му претходеше потег од 1 јуни, кога Кина веќе ги испрати своите бродови на крајбрежната стража на „патроли за спроведување на законот“ источно од Тајван за отворено да го покаже своето незадоволство. Министерството за одбрана на Тајван не одговори веднаш на барањето за коментар.

Закана од војна: Јапонија и Филипините се подготвени да одговорат на инвазија

Најновите искри на рутата Пекинг-Токио-Манила избувнаа по минатонеделниот состанок меѓу јапонскиот премиер Санае Такаичи и филипинскиот претседател Фердинанд Маркос помладиот. Маркос по состанокот изјави дека двете земји делат цврста посветеност на зајакнување на поморската безбедност.

Двете нации претходно го навлекоа гневот на Пекинг со своите отворени изјави за Тајван. Минатиот месец, филипинскиот лидер изјави дека неговата земја веројатно ќе се вклучи во случај на конфликт околу Тајван, поради самата близина на островот. Од друга страна, јапонскиот премиер Такаичи во ноември изјави дека кинеската инвазија на Тајван може да биде оправдана причина Јапонија да ја испрати својата војска на островот.