Клековски: Опфатот со вакцината против морбили е 62%, можна е епидемија во Македонија

Министерот за здравство Сашо Клековски апелираше до родителите да ги вакцинираат своите деца против мали сипаници (морбили), предупредувајќи дека нискиот опфат со вакцинација создава ризик од појава на епидемија и во Македонија.

Според податоците што ги соопшти, опфатот со првата доза од вакцината против морбили изнесува само 62 проценти.

– Апелирам до сите граѓани на Македонија поревносно да пристапат кон вакцинацијата против морбили, бидејќи опфатот е релативно низок и изнесува 62 проценти. Ова го кажувам затоа што во моментот расте бројот на заболени од морбили во Косово и Бугарија. Имаме причина да почнеме со алармирање и во наредните денови и недели, преку повеќе активности, ќе се обидеме да ги мотивираме граѓаните да ги вакцинираат своите деца и да го зголемиме опфатот, бидејќи можна е епидемија на морбили и во Македонија – изјави Клековски.

Дека проблемот не се однесува само на вакцината против морбили посочува и д-р Драган Кочински, раководител на Одделот за епидемиологија на заразни заболувања при Институтот за јавно здравје. Тој вели дека опфатот е намален и кај останатите вакцини од редовниот календар за имунизација.

Според него, кај ниту една од вакцините од редовниот календар, кога станува збор за првата доза, не е достигнат посакуваниот опфат од 95 проценти.

– За хепатитис Б имаме опфат од 77 проценти, за хемофилус инфлуенца 78 проценти, а за дифтерија, тетанус и пертусис 79 проценти, иако во 2024 година имавме епидемија. Опфатот со вакцината против полио е 79 проценти, додека кај морбили е само 62 проценти – изјави д-р Кочински.

Низок останува и опфатот со ХПВ вакцината, кој изнесува 51 процент. Кај поновите вакцини, опфатот со ротавирусната вакцина изнесува 64 проценти, а со пневмококната 80 проценти.

Состојбата е нешто подобра кај ревакцинацијата. Кај МРП вакцината опфатот со ревакцинација изнесува 85 проценти, но, според Кочински, ниту тоа не е доволно за создавање колективен имунитет.

– Потребно е и на национално и на регионално ниво да имаме опфат над 90 проценти – рече Кочински.

Податоците за изминатите пет години покажуваат дека просечниот опфат со првата доза од МРП вакцината изнесува околу 70 проценти, додека кај ревакцинацијата просекот е 81 процент.

Највисок опфат бил регистриран во 2019 година, кога во земјава имаше епидемија на морбили и беа преземени засилени противепидемиски мерки.

Поради актуелната состојба во регионот, здравствените институции се подготвуваат и планираат дополнителни активности за зголемување на вакцинацијата и мотивирање на родителите навреме да ги вакцинираат своите деца.

Во рамки на редовните активности, Центрите за јавно здравје и Институтот за јавно здравје вршат проверки на вакциналните пунктови, работат на идентификување на невакцинираните деца, а епидемиолозите посетуваат училишта каде што одржуваат предавања и едукативни активности за значењето на имунизацијата.

Share on Facebook

Tweet

Follow us

Save