Косовската министерка за трговија, Хајдари обвинета за корупција

Косовската министерка за трговија Розета Хајдари и двајца високи функционери се обвинети за злоупотреба на службена должност во корист на трето лице и откривање државни тајни, објави денеска Обвинителството.

Тројцата се осомничени за олеснување на склучувањето договори за купување нафта од Полска и пченица од Турција, за време на пандемијата Ковид-19, во вредност од неколку милиони евра и по цени далеку над пазарните цени, во корист на турски претприемач, кој исто така е обвинет.

Според Обвинителството проценетата штета врз финансиите на Косово изнесува приближно три милиони евра.

Косово наводно купило стока по цени што далеку ги надминале пазарните цени, заобиколувајќи ги тендерите за јавни набавки, при што стоката никогаш не била испорачана.

Хајдари реагираше на Фејсбук, наведувајќи дека ќе објави детална изјава кога ќе добие известување за обвинението. Таа додаде дека е горда на својата работа бидејќи обезбедила Косово да има „основни производи во резерва, во време кога бевме ранливи“.

Share on Facebook

Tweet

Follow us

Save