Косовската претседателка добила закана со смрт

Косовската претседателка Вјоса Османи добила закана со смрт која пристигнала на е-поштата на косовското претседателство. Кабинетот на претседателот потврди дека таа добила закана со смрт на 15 мај, а нејзиниот советник за медиуми Беким Купина истакна дека ова не е првата закана со која се соочила Османи, но дека досега никој не е повикан на одговорност за тоа, објави „Репортери“.

Најновата закана пристигна на е-поштата на косовското претседателство на 15 мај, денот кога Османи ги започна консултациите со лидерите на политичките партии за тоа како да се надмине институционалната криза. Купина рече дека Османи „постојано добива закани“, но дека никој од оние што ѝ се заканувале не одговорил.

„И покрај десетиците закани – претежно закани со смрт – со години не се преземени никакви мерки против сторителите, иако во повеќето случаи заканите се упатуваат со име и презиме, од идентификувани профили. Некои закани беа упатени дури и во телевизиски емисии, но дури и тогаш немаше никакви мерки за повикување на одговорност на сторителите. Случајот на повторени закани со смрт против претседателката и нејзиното семејство е единствениот во историјата, како што ни кажаа безбедносните институции, во кој ниту еден од сторителите не се соочи со правдата“, рече Купина.

Тој додаде дека заканите, кога не се сфаќаат сериозно, не само што не престануваат, туку и се охрабруваат. „Оваа опасна клима ги охрабрува и другите да го следат истиот модел: поттикнување на насилство, повици за физичка елиминација и целосно непочитување на уставниот поредок“, рече Купина.

Share on Facebook

Tweet

Follow us

Save