Кој кого нападна? Украинските бунтовници велат дека Киев ги гранатирал, владата демантира: „Тие нѐ нападнаа нас“

Украинските безбедносни сили утринава два часа гранатираа девет населени места на териториите на самопрогласените Доњецкa и Луганскa народнa републикa, тврдат локалните власти, додека украинската армија негира дека извршила таква акција.

„Испукани се околу 160 гранати со калибар поголем од 12,7 милиметри“, велат локалните власти.

Според претставникот на Доњецк, „вооружените формации на Украина грубо го прекршија режимот на прекин на огнот, користејќи оружје што, во согласност со договорите од Минск, мораше да биде повлечено“.

Според него, од 3.30 часот по средноевропско време, украинската армија со минофрлачи со калибар 120 и 82 милиметри, фрлачи на гранати и тешки митралези гаѓала кон населбите Сокољники, Золото 5, Весјоленко, Нижне Лозово и Доњецки, кои се под контрола на Луганск. Сепак, украинската влада ги негира наводите.

„И покрај фактот што нашите позиции беа гаѓани со забрането оружје, вклучително и артилерија од калибар 122 милиметри, украинските војници не отворија оган како одговор на тоа“, изјави за Ројтерс портпаролот на операцијата на украинските здружени сили.

Засега не се знае колку се сериозни инцидентите и нема реакција од Организацијата за безбедност и соработка во Европа (ОБСЕ), која ја надгледува ситуацијата во источна Украина, но која во последните денови повлече некои од своите набљудувачи.

Share on Facebook

Tweet

Follow us

Save