INFOMAX.MK

Косовскиот премиер Албин Курти вечерва во разговор со претставникот на ЕУ, Мирослав Лајчак и американскиот претставник за Западен Балкан, Габриел Ескобар, побара од Брисел и Вашингтон да повикаат на прекин на насилството врз домашните и меѓународните безбедносни сили во север и гонење и казнување на сторителите.

Во соопштението на косовската влада се наведува дека Курти и првиот потпретседател Бесник Бислими биле домаќини на средбата и им се заблагодариле на претставниците на ЕУ и САД за нивната посета, континуираниот интерес и добрата волја за изнаоѓање решение за ситуацијата на северот.

„Беа разменети мислења за состојбите и последните случувања, идеи за деескалација на ситуацијата на северот и итноста за имплементација на Основниот договор и Анексот за имплементација. Премиерот рече дека патот до деескалација е веднаш да се запре напади на насилни екстремисти и криминални групи врз домашни и меѓународни безбедносни сили и новинари“, се наведува во соопштението.

Само владеењето на правото може да го отвори патот за вонредни, слободни, демократски и фер избори, рече Курти.

„Вака треба да биде предизборната кампања. Кандидатите и гласачите на новите избори мора да се натпреваруваат и да учествуваат без страв и закани“, додаде тој.

Посочи дека во ваква ситуација сигурно ќе се намали бројот на полицајци во општинските згради во трите северни општини.

Курти, како што се наведува, изразил „безрезервна подготвеност и непоколеблива добра волја за интензивен и заеднички ангажман за деескалација на ситуацијата и нормализирање на односите“.