Левица: Владата троши, народот штети – Фискална консолидација на грбот на граѓаните

Во Собранието пристигна Предлог-ребалансот на Буџетот за 2025 година, кој од Владата беше претставен како продолжение на процесот на фискална консолидација и стабилизација на макроекономската состојба. Сепак, овој ребаланс претставува уште еден пример за структурно погрешна и длабоко класно пристрасна буџетска политика, реагираат од Левица.

– Наместо да се насочи кон прогресивна мобилизација на јавните приходи (преку повисоки даноци за профитабилниот капитал и високите приходи), Министерството за финансии повторно ја товари фискалната рамнотежа врз грбот на граѓаните, со минимални или непостоечки структурни реформи.

Во однос на капиталните расходи, постои селективна реалокација а не рамноправен развој. Спомнувањето на Министерството за одбрана како ресор со „добра реализација“ го отвора прашањето: дали државата ја гради економијата или ја милитаризира? Во услови кога образованието и здравствто тоне во недостиг од кадар и инфраструктурна руинираност, зголемувањето на воените буџети е антинароден потег.

Обезбедувањето дополнителни средства за зголемување на платите во МВР (за 10%), без истовремено вложување во јавните сектори кои директно го подобруваат квалитетот на животот, јасно укажува на клиентелистички приоритети – државата го наградува репресивниот апарат, додека наставниците и здравствените работници и натаму остануваат потценети и занемарени.

Министерството за финансии останува на проектираниот раст од 3,7%, базиран пред сѐ на „зголемена домашна потрошувачка“ и „инвестиции во инфраструктурата“. Но, оваа формула е веќе видена и не функционира во услови на стагнирачки реални плати, демографска депопулација и невработеност кај младите. Левица одамна предупредува дека овие проекции се базирани на вештачка статистика и краткорочен оптимизам. Впрочем и НБРМ изелзе со намалена прогноза на растот на БДП на 3%.

Предлог-ребалансот на Буџетот за 2025 година е технократски производ на постојниот неолиберален економски режим кој ги репродуцира класните разлики, ја потхранува централизацијата на капиталот и го маргинализира трудот, младите, сиромашните. – стои во објавата на Левица.

Share on Facebook

Tweet

Follow us

Save