INFOMAX.MK

Лидерите на САД, Велика Британија, Франција и Германија се очекува вечерва преку видео врска да разговараат за ситуацијата во Израел и на палестинските територии, изјави германскиот канцелар Олаф Шолц.

„САД, Велика Британија, Франција и Германија се согласуваат дека ова не смее да стане пожар во регионот. Затоа никој не треба да продолжи да поттикнува терор во оваа ситуација“, изјави Шолц за новинарите во германскиот град Хамбург.

Шолц беше во друштво на францускиот претседател Емануел Макрон, кој беше поканет во северното германско пристаниште на заедничка средба на владите на двете земји

Макрон ја изрази својата тотална солидарност со израелскиот народ и рече дека утрово повторно разговарал со израелскиот премиер Бенјамин Нетанјаху.

„Германија и Франција стојат покрај израелскиот народ во овој трагичен момент. Борбата против тероризмот е заедничка цел што ќе продолжиме да ја следиме со Израел и нашите сојузници. Ништо не го оправдува, ништо не го објаснува“, рече Макрон.

Кабинетот на францускиот претседател подоцна објави дека италијанската премиерка Џорџија Мелони исто така ќе се придружи на поканата како дел од таканаречената Квинта, неофицијална група составена од САД, Велика Британија, Франција, Германија и Италија.