INFOMAX.MK

После стартната победа за успешен почеток на новиот евроквалификациски циклус за пласман на ЕП 2024 во Германија во март со Малта (2-1), македонската фудбалска репрезентација вечерва (20.45 часот) против Украина ги почнува вистинските предизвици во „групата на смртта“, но освен што против себе има исклучително квалитетна селекција, ќе игра и против една – црна јунска традиција.

Самиот факт дека пред Македонија е најскапиот Украинец, Михајло Мудрик вреден сто милиони евра кој зимава потпиша за Челси од украински Шахтер, па играчи како Јармоленко, Миколенко, Малиновски… е исклучително тежок предизвик, Македонија во јуни веќе цела деценија мака мачи за добри резултати зашто од 2013 година наваму имаме дури 13 порази во 19 меча и само – три победи.

Ако има период во годината кога Македонија најмогу се мачи, без оглед која генерација и кој селектор ја водел, тоа е дефинитивно јуни зашто ниту една важна победа во историјата не е запишана месецов, а во оваа деценија трите победи се ланските две со Гибралтар (2-0, 4-0) и една година претходно со Казахстан (4-0) во подготвителен меч за настапот на Еуро 2020.

Колку е проблематичен јуни, особено што после напорна сезона исцрпеноста е најголема, како физички, така и психолошки, најдобар податок се само двете победи во 11 пресметки на официјални мечеви, квалификациски, Лига на нации или Европско првенство и дури осум порази со едно реми.

Затоа пред оваа генерација и селекторот Благоја Милевски сега е силен предизвик против гигант како Украина со извонредна селекција да покажат дека овојпат јуни нема да биде така црн како во минатите години на резултатски план, зашто фудбалскиот впечаток е залуден без добар резултат. А, по овој денешен меч во Скопје, следниот предизвик е уште поголем, против актиелниот европски вицепрвак Англија.

СИТЕ ЈУНСКИ МЕЧЕВИ НА МАКЕДОНИЈА ВО ПОСЛЕДНАВА ДЕЦЕНИЈА

2013 ГОДИНА
3 јуни (Малме) – Шведска 0-1 – пријателска
11 јуни (Осло) – Норвешка 0-2 – пријателска

2014 ГОДИНА
18 јуни (Шенјанг) – Кина 0-2 – пријателска
22 јуни (Жинан) – Кина 0-0 – пријателска

2015 ГОДИНА
14 јуни (Жилина) – Словачка 1-2 – квалификации Еуро 2016

2016 ГОДИНА
2 јуни (Скопје) – Иран 1-3 – пријателска

2017 ГОДИНА
5 јуни (Скопје) – Турција 0-0 – пријателска
11 јуни (Скопје) – Шпанија 1-2 – квалификации СП 2018

2018 ГОДИНА
без мечеви во јуни

2019 ГОДИНА
7 јуни (Скопје) – Полска 0-1 – квалиификации Еуро 2020
10 јуни (Скопје) – Австрија 1-4 – квалификации Еуро 2020

2020 ГОДИНА
без мечеви поради локдаунот за ковид-пандемијата

2021 ГОДИНА
1 јуни (Скопје) – Словенија 1-1 – пријателска пред Еуро 2020
4 јуни (Скопје) – Казахстан 4-0 – пријателска пред Еуро 2020
13 јуни (Букурешт) – Австрија 1-3 – Еуро 2020
17 јуни (Букурешт) – Украина 1-2 – Еуро 2020
21 јуни (Амстердам) – Холандија 0-3 – Еуро 2020

2022 ГОДИНА
2 јуни (Разград) – Бугарија 1-1 – Лига на нации
5 јуни (Гибралтар) – Гибралтар 2-0 – Лига на нации
9 јуни (Скопје) – Грузија 0-3 – Лига на нации
12 јуни (Скопје) – Гибралтар 4-0 – Лига на нации

ВКУПНО: 19 меча – 3 победи, 4 ремија, 13 порази

Извор: sport1.mk