Македонското Министерство за образование ќе го ревидира воспитниот процес по масовните убиства во Србија

Македонското Министерството за образование и наука најави дека по двете масовни убиства во Србија во последните два дена,  денеска ќе одржи средба со универзитетски професори од областа на педагогијата, психологијата, социологијата, безбедноста и сајбер насилството и други.

Од МОН велат дека случувањата во соседството вклучија сериозен аларм дека индивидуалната посветеност и грижата за правилниот раст и развој на децата треба да се подигнат на уште повисоко ниво.

-Како креатори на образовните политики, МОН заедно со Владата и сите други засегнати институции и установи, согласно своите надлежности, веднаш започнуваме со ревидирање на воспитната компонента на образовниот систем, механизмите за детекција на предизвици и формите на поддршка на учениците и семејствата. Очекуваме поддршка од сите засегнати чинители, експертската јавност, граѓанскиот и невладиниот сектор, бизнис-заедницата и меѓународните партнери, кои и досега имаат важен придонес во напорите за заштита на правата на децата, за заштита на физичкото и менталното здравје, спречувањето на врсничко и неврсничко насилство и така натаму, велат од МОН.

Заклучоците и препораките од денешната средба ќе бидат соопштени по нејзиното завршување, а тие ќе бидат иницијален чекор за подигнување на институционалната грижа за правилен раст и развој на младите.

Share on Facebook

Tweet

Follow us

Save