INFOMAX.MK

Францускиот претседател Емануел Макрон изјави дека на вчерашните разговори со српскиот претседател Александар Вучиќ и со косовскиот премиер Албин Курти биле добиени јасни изјави дека се подготвени да ги спроведат постигнатите договори.
На прес-конференцијата по Самитот на ЕУ, Макрон посочи дека, покрај војната во Украина, како и ситуацијата во Израел, лидерите на Унијата се фокусирале и на ситуацијата на Западен Балкан.

„Се занимававме со Косово и Србија. Италијанскиот премиер Џорџа Мелони, германскиот канцелар Олаф Шолц, претседателот на Советот на ЕУ, Чарлс Мишел, шефот на европската дипломатија Жозеп Борел, специјалниот претставник на ЕУ за дијалог Мирослав Лајчак и јас вчера разговаравме со премиерот Курти и претседателот Вучиќ. Тие јасно изразија подготвеност за спроведување на Бриселскиот и Охридскиот договор, како и за што поскоро формирање на ЗСО“, рече тој.

Макрон нагласи дека ЕУ сака тоа да стане реалност сега и да продолжи нормализацијата на односите.

„Го осудивме нападот на 24 септември и побаравме јасни мерки и истрага од претседателот Вучиќ“, нагласи Макрон.