Макрон повика на воздржаност додека продолжуваат протестите во француските училишта

Францускиот претседател Емануел Макрон повика на воздржаност и емпатија за време на кризниот состанок за бранот протести во средните училишта и универзитетите, додека владата стравува дека незадоволството од трошоците за живот може да прерасне во нови масовни демонстрации од типот на „Жолтите елеци“.

Во меѓувреме, министерот за внатрешни работи Лоран Нуњез денеска соопшти дека полицијата веднаш ќе ја прекине употребата на шок-гранати за време на студентските протести. Одлуката доаѓа откако во понеделникот, во северниот град Ланс, шок-граната што ја фрлила полицијата му ја отсекла раката на 15-годишно момче, што предизвика поголем револт во јавноста поради наводната полициска бруталност.

Француската престолнина и утрово се соочи со изолирани блокади на средните училишта и универзитетите, меѓу кои и на престижниот факултет „Сианс По“. Како превентивна мерка, дури 528 училишта останаа целосно или делумно затворени. Синдикатите во образованието веќе повикаа на нови масовни протести утре, барајќи подобри услови за учење, опрема и вработување дополнителен наставен кадар.

Според податоците на Министерството за внатрешни работи, на вчерашните протестни маршеви во Париз и во другите поголеми градови учествувале 266.000 луѓе, додека синдикатите проценија дека бројката на учесници достигнала 450.000.

Француските власти стравуваат дека студентските револти – додатно поттикнати од високите цени на горивата и општите трошоци за живот – би можеле да се прелеат и во сите останати сектори, слично на движењето „Жолти елеци“ кое ја парализираше Франција во 2019 година. Поради ова, премиерот Себастиен Лекорну за вечерва најави вонреден говор посветен на состојбите во образованието, цените на горивата, земјоделската криза и финансиската нестабилност на земјата.

Share on Facebook

Tweet

Follow us

Save