INFOMAX.MK

Русија не треба да ги држи како затвореници војниците на НАТО кои ќе бидат пронајдени во Украина, туку треба да постои награда за секој убиен НАТО војник, смета порашениот руски претседател Дмитриј Медведев.

„Постои само едно правило за овие вошки од странство – нема затвореници! Тие, за разлика од несреќните Украинци, не беа принудени да војуваат. И мора да има максимална награда за секој убиен, разнесен или запален борец на НАТО“, напиша тој на Икс.

Медведев се осврна и на можноста НАТО да распореди трупи во Западна Украина за да „одржуваат и организираат обука“.

„Тие се крајно дрски ѕверови кои го земаат целиот свет за будали“, напиша Медведев и истакна дека сите сили на НАТО во Украина ќе се сметаат за дел од редовната армија што се бори против Русија.

„Затоа тие можат да се третираат само како непријатели; и не само непријатели, туку како елитни одреди, СС-луѓе на Хитлер“, додава тој во објавата.

Додека заканите на Медведев се сметаат за обична реторика и пропаганда во Западниот свет, Бизнис Инсајдер пишува дека зборовите на овој поранешен руски претседател и висок соработник на Путин не треба да се игнорираат.

Лидерите на НАТО неодамна ја отфрлија идејата на францускиот претседател Емануел Макрон кој изјави дека останува отворен дури и за можноста за испраќање француски трупи во Украина.

Исто така, има индиции за помало присуство на НАТО во Украина. На почетокот на 2023 година протекоа доверливи документи од Пентагон, во кои се вели дека во Украина во еден момент биле испратени околу сто оперативци на НАТО, меѓу кои и 14 припадници на американските специјални сили. Американците и НАТО во неколку наврати го демантираа тоа.

Не помогна тоа што полскиот министер за надворешни работи Радек Сикорски тврдеше дека војниците на НАТО се „веќе присутни во Украина“, но не кажа колку се распоредени или за каква цел.

Our NATO friends have got a new mantra. Now they are collectively saying that intervention in “Ukraine” is not in plans. Just some troops will enter an area near Lvov and maybe Kiev to relieve the Ukrainian army. Kind of, doing housekeeping and organising; training; bringing…

— Dmitry Medvedev (@MedvedevRussiaE) April 4, 2024