Мамдани му одговори на Нетанјаху: Налогот за апсење сè уште важи

Конфликтот меѓу израелскиот премиер Бенјамин Нетанјаху и градоначалникот на Њујорк, Зоран Мамдани, доби нова епизода за време на Генералното собрание на Обединетите нации. Во својот говор, Нетанјаху директно го нападна Мамдани, нарекувајќи го „антисемитски градоначалник“ на Њујорк и обвинувајќи го дека со своите критики за израелските воени операции ги загрозува Евреите во градот. Мамдани возврати дека израелскиот премиер повторил, како што рече, „неосновани лаги“.

Уште пред своето обраќање во ОН, Нетанјаху на социјалните мрежи најавуваше дека за време на говорот ќе ја „открие вистината“ за градоначалникот на Њујорк.

Обраќајќи му се директно за време на говорот, Нетанјаху рече дека Мамдани не може да го замолчи и дека нема да го спречи – како што изјави – да ја кажува вистината. Израелскиот премиер го обвини Мамдани дека шири лаги за Израел и дека со критиките за израелските воени операции ги загрозува Евреите во Њујорк. Тој исто така го нарече „антисемитски градоначалник“ на тој град.

Додека Нетанјаху зборуваше, дел од делегатите ја напуштија салата на Генералното собрание на ОН. Одделни делегати си заминаа уште пред да започне неговото обраќање.

Мамдани не одговори директно за време на говорот на Нетанјаху, но подоцна се огласи со соопштение. Тој наведе дека израелскиот премиер го искористил говорот во ОН за да ги повтори, како што оцени, „неоснованите лаги“ со кои се обидува да го прикрие страдањето на Палестинците.

Мамдани повторно укажа и на налогот за апсење што Меѓународниот кривичен суд го издаде за Нетанјаху во 2024 година.

Меѓународниот кривичен суд во ноември 2024 година издаде налози за апсење на Нетанјаху и на тогашниот израелски министер за одбрана Јоав Галант, наведувајќи дека постојат разумни основи за сомневање дека се одговорни за воени злосторства и злосторства против човештвото. Израел ги отфрла обвинувањата и ја оспорува надлежноста на судот. Конфликтот меѓу Нетанјаху и Мамдани започна уште за време на кампањата на Мамдани за градоначалник на Њујорк.

Додека Нетанјаху зборуваше во седиштето на Обединетите нации, пред зградата се одржуваше протест против неговата посета и политиката на Израел. Според наводите од извештаите од протестот, се собраа околу 200 демонстранти, а полицијата приведе околу 100 луѓе. Меѓу приведените беше и актерката Сузан Сарандон.

Share on Facebook

Tweet

Follow us

Save