Маричиќ: Денес сме респектабилна земја која има сојузници низ целиот свет

Пред 31 година граѓаните избраа да живеат во независна, демократска, мирна, стабилна и просперитетна држава, вака вицепремиерот за европски прашања, Бојан Маричиќ ја започна својата честитка по повод 8 септември – Денот на независноста.

Маричиќ порача дека изминатите години сведочат за посветена работа во градење и развивање на Македонија како слободно, одговорно и економски силно општество со целосна афирмација на граѓанските вредности.

-Граѓаните имаат причина да слават. Успеавме и покрај сите предизвици, да останеме јасно ориентирани кон евроатлантските интеграции, инвестирајќи во нашата стратешка цел до крај. Да се стане членка на НАТО за мала земја, како нашата, е големо достигнување, а со отворањето на пристапните преговори за полноправно членство во ЕУ, направен е уште еден важен чекор напред во вистинската насока, истакна вицепремиерот.

Според него, отворањето на преговорите за пристапување во ЕУ ќе ни помогнат забрзано да се движиме низ реформите и да се фокусираме на оние од приоритетна важност.

-Денес сме респектабилна земја која има сојузници низ целиот свет, која е почитувана и препознаена по нејзините напори и мудрост да го трасира својот европски пат за нејзините генерации. Модерна, европска и просперитетна Македонија за сите нејзини граѓани. Нека ни е вечна независноста и државноста. Да живее Републиката, стои во честитката на Маричиќ.

Share on Facebook

Tweet

Follow us

Save