Маричиќ: Македонците и современиот македонски јазик се впишани во ризницата на светските народи и јазици

Денеска го одбележуваме празникот Свети Климент Охридски, посветен на светителот кој на македонско тло ја создаде кирилицата и кој со своето дело го обедини светото и световното, оставајќи зад себе силни универзални вредности, истакна вицепремиерот за евроинтеграции Бојан Маричиќ.

„Како основач на Охридската книжевна школа, односно на првиот балкански и европски универзитет, Свети Климент Охридски не само што ја продолжил мисијата на светите браќа Кирил и Методиј, туку и на најдобар начин ги застапувал вредностите на просветителството преку учењето за солидарноста на христијанскиот дух и верата на луѓето.

Свети Климент Охридски како еден од најблиските и најревносните соработници на светите браќа Кирил и Методиј ја продолжил мисијата за описменување на народите на Балканот и во Македонија, и во нивна чест ја унапредил глаголицата во кирилица и така ги создал никулците на македонскиот јазик и писмо.

Денес, Македонците и современиот македонски јазик се впишани во ризницата на светските народи и јазици, и никој повеќе нема дилеми, никој повеќе не го оспорува тоа. Ние денеска ги препознаваме делата на Свети Климент Охридски како епохални и безвременски.

Тие за навек не задолжија нас да го чествуваме овој голем празник, да покажеме поголемо заедништво и мудрост и да излеземе посилни пред предизвиците со кои се соочуваме“, порача Маричиќ.

Share on Facebook

Tweet

Follow us

Save