Маѓар: Унгарија е против забрзано членство во ЕУ за која било земја кандидат

Унгарија не поддржува забрзана постапка за прием во Европската Унија на ниту една земја кандидат, изјави унгарскиот премиер Петер Маѓар по средбата со претседателот на Европскиот совет, Антонио Кошта, во Будимпешта.

„Потврдив дека Унгарија не поддржува забрзан процес на пристапување за ниту една земја кандидат“, соопшти Маѓар по разговорите.

Неговата порака не значи противење на политиката на проширување, туку инсистирање приемот на нови членки да се спроведува според постојните критериуми и врз основа на постигнатите резултати. Ставот се однесува на сите кандидати, вклучително и на Украина, за која во Европската Унија се разгледуваат можности за побрзо напредување.

Маѓар и претходно се изјаснуваше против забрзано членство на Украина и бараше земјите од Западен Балкан, кои со години се наоѓаат во пристапниот процес, да не бидат ставени во втор план.

Во мај тој порача дека ЕУ мора да го зачува својот кредибилитет и да им даде предност на долгогодишните кандидати од Западен Балкан пред Украина. Во јуни повторно нагласи дека проширувањето мора да биде засновано врз заслуги и дека не би било ниту чесно ниту прагматично балканските држави да бидат заобиколени преку поинаков пристапен модел за Украина.

На средбата во Будимпешта се разговарало и за следниот седумгодишен буџет на Европската Унија, одбраната, конкурентноста и европската поддршка за Украина.

Според Маѓар, Унгарија ќе го поддржи идниот повеќегодишен буџет само доколку тој им служи и на интересите на унгарските граѓани. Будимпешта очекува да добие признание за својата улога во заштитата на надворешните граници на Унијата и се противи на предлози што би можеле да доведат до намалување на земјоделските субвенции.

Изјавата на унгарскиот премиер доаѓа во период кога во Брисел се води расправа дали процесот на проширување треба да се забрза поради геополитичките и безбедносните промени во Европа или кандидатите да продолжат да ги исполнуваат сите услови според редовната постапка.

Share on Facebook

Tweet

Follow us

Save