Медведев: Можно е Русија да анектира уште украински територии

Поранешниот руски претседател Дмитриј Медведев предложи можност за натамошна анексија на територија на Украина, јави германската новинска агенција dpa, пренесува Хина.

На партискиот конгрес на партијата Единствена Русија во Кремљ, Медведев во петокот рече дека е неопходно да се развијат регионите кои се веќе припоени кон Москва – Доњецк, Луганск, Запорожје и Керсон.

„Тоа искуство, инаку, би можело да биде од помош доколку кај нас се појават уште нови региони кои се многу блиску“, што, како што рече, е сосема можно.

Медведев останува влијателен како претседател на партијата Единствена Русија и заменик-шеф на Советот за национална безбедност на Русија.

Русија, која започна војна против Украина во февруари 2022 година под изговор дека го штити цивилното население на Донбас што зборува руски, досега само делумно ги окупираше четирите региони, но бара нивно предавање од Киев како предуслов за мировни преговори.

Москва постојано се заканува со дополнителни анексии доколку Украина не го прифати барањето.

Share on Facebook

Tweet

Follow us

Save