Мерц и Лула против американска интервенција на Куба, Лула: Војната со Иран е лудило

Германскиот канцелар Фридрих Мерц изјави дека САД немаат основа за евентуална интервенција на Куба, оценувајќи дека, и покрај внатрешните проблеми на островот, Куба не претставува закана за други држави. Пораката ја испрати по германско-бразилските владини консултации во Хановер, каде заедно со бразилскиот претседател Луиз Инасио Лула да Силва повика на дипломатско, а не воено решавање на кризите.

Мерц нагласи дека секоја држава има право на одбрана, но тоа не значи и право на воена интервенција во друга земја само затоа што нејзиниот политички систем не одговара на нечии претстави. Според него, отворањето нов конфликт околу Куба не би било оправдано и треба да се избегне.

Сличен став искажа и Лула, кој рече дека е против нарушување на територијалниот интегритет на државите и против мешање во внатрешното уредување на други земји. Бразилскиот претседател ја отвори и темата за почитувањето на Повелбата на Обединетите нации, како и правото на народите на самоопределување.

Пред средбата со Мерц, Лула на отворањето на саемот во Хановер жестоко ја критикуваше и војната против Иран, нарекувајќи ја „лудило“. Тој оцени дека е неприфатливо во 21 век милијарди долари да се трошат на војни, додека гладот, неписменоста и недостигот од електрична енергија и натаму остануваат нерешени проблеми за милијарди луѓе.

Изјавите на двајцата лидери доаѓаат во чувствителен момент на засилени тензии околу Куба и Иран. Ројтерс претходно објави дека Куба веќе со месеци е под силен притисок поради американската блокада на нафтата, а властите во Хавана предупредија дека островот се соочува со длабока енергетска криза и чести прекини на струја.

Share on Facebook

Tweet

Follow us

Save