Мецола: Проширувањето на ЕУ е геополитичка нужност

Претседателката на Европскиот парламент Роберта Мецола денеска изјави дека проширувањето на ЕУ е геополитичка неопходност и предупреди дека доколку ЕУ продолжи да го одложува процесот, „другите ќе се вклучат за да ја пополнат празнината“.
„Проширувањето повеќе не е само благородна амбиција, тоа сега, јас цврсто верувам, е геополитичка неопходност“, рече Мецола на годишната конференција на амбасадорите на ЕУ во Брисел, тврдејќи дека „руското мешање во Молдавија, Грузија и Западен Балкан е директен предизвик“ за колективната безбедност на ЕУ.

Истовремено, таа посочи дека ЕУ изгубила повеќе членки отколку што добила во последната деценија.

„Размислете малку и тогаш ќе разберете зошто. Ако продолжиме да го одложуваме проширувањето, а сме имале самит еден по друг на кој сме разговарале за какви заклучоци ќе дојдеме, понекогаш со 27 различни толкувања на тие заклучоци, понекогаш со 27 плус три различни толкувања на тие заклучоци, Ако продолжиме да го правиме тоа, тогаш другите ќе се вклучат за да ја пополнат празнината“, рече Мецола додека зборуваше за соседството на ЕУ и нејзината визија за Европа.

Кога станува збор за односите со САД, таа истакна дека трговските војни никому не му користат и рече дека прв приоритет на ЕУ мора да биде да ги избегне „бидејќи ситуацијата во која сите губат не е во ничиј интерес“.

„Европа е подготвена за секој исход и ние ќе зборуваме од позиција на сила. Поединечно сите сме мали актери, но заедно сме сила која никој не може да ја игнорира“, рече Мецола.

Таа додаде дека САД се еден од најстарите и најсилните сојузници на Европа и предупреди дека меѓусебните царини ќе им наштетат на компаниите и луѓето од двете страни на Атлантикот.

Share on Facebook

Tweet

Follow us

Save