Мечка Снимена како трча во близина на Градскиот парк во Битола

Снимена е мечка како трча низ улицата Македонска фаланга кај Градскиот парк во Битола и објавена на социјалните мрежи. Снимките презивикаа вознемиреност кај битолчани зашто паркот е доста фреквентно место, често посетено и од родители со мали деца и пензионери, а на истата улица каде беше снимено животното се наоѓаат и Средното медицинско училиште и Техничкиот факултет, а во непосредна близина и средношколскиот дом „Мирка Гинова“.

Мечката веројатно била снимена синоќа. Станува збор за поголемо мече кое трча по патот додека зад него вози автомобил.

Од СВР Битола велат дека случајот е пријавен кај нив, а од Општината дека контактираат со надлежни иснтитуции за да бидат преземени соодветни мерки.

Со години отстрелот на мечки е забранет со закон поради што овие диви животни се намножија во планинските предели околу Битола. Ова не е првпат мечка да се симне во градот. Во мај 2022 беше снимена како трча низ населбата Буковски ливади.

Според член 11 од Законот за дивечот и ловството, мечката е заштитен вид и нејзиното ловење е строго забрането. Дополнително, член 14 од истиот закон трајно ја забранува можноста за лов на мечки, без исклучоци. Според Кривичниот законик, ловењето дивеч под заштита, како што е мечката, се казнува со затворска казна од една до пет години. За да има хајка, потребно е надлежните државни органи да проценат дека животното претставува опасност за луѓе, населени места и добиток или предизвикува големи штети, па да се дозволи и организира отстрел.

Во меѓувреме, државата плаќа големи отштети на граѓани кои тужеле за претрпени штети од мечки, а судот ги осудил животните.

Share on Facebook

Tweet

Follow us

Save