Меџити од Одеса: Силно ја осудуваме руската агресија, бараме војната итно да запре

Вицепремиерот Изет Меџити денеска учествуваше на Самитот „Украина – Југоисточна Европа“ што се одржа во Одеса, Украина.

Самитот, кој беше отворен од претседателот на Украина, Володимир Зеленски, претставува продолжение на претходните средби одржани во Атина, Тирана и Дубровник, со учество на високи претставници од земјите на Југоисточна Европа. Главната цел на самитот е поддршка за Украина и зајакнување на регионалната соработка и безбедноста.

Во своето обраќање, вицепремиерот Меџити изрази благодарност за гостопримството на украинските власти и ја реафирмираше непоколебливата поддршка од страна на Северна Македонија за суверенитетот и територијалниот интегритет на Украина.

„Обединети сме пред предизвиците кои го загрозуваат мирот, безбедноста и меѓународниот поредок. Силно ја осудуваме руската агресија и бараме итно запирање на војната“, рече тој.

Меџити, според соопштението од Владата, „ја нагласил и посветеноста на земјата за продлабочена регионална соработка и изградба на безбедна, мирољубива и демократска Европа.“

Share on Facebook

Tweet

Follow us

Save